Молитва к иконе "Бугобашская"

Печать
О Мати Милосердая, неизреченною духовною мудростию и дарованиями преисполненная, многажды Сына Твоего и Бога нашего о нас умоляющая; о сохранении Православия не токмо земли Уфимския, но и во всей стране нашей попечение имущая; и весь мир милостию Твоею богатою не оставляющая. Молим Тя, Всесильную нашу Заступницу, обрати сердца наша от тьмы неверия, вражды и соблазнов к свету тихой о Бозе радости; не остави милостию Твоею согрешившия люди Твоя, в скорбех, болезнех, печалех пребывающия; коснися Божественною благодатию окаменелых сердец наших, да воспоем многое Твое Матернее долготерпение. Приими, Всепетая, молитвы всех, у иконы Твоей Тебе припадающих, и своя прошения усердно приносящих: и пастырей ревностию апостольскою украси, градоправителем о людех попечение даруй; матерей, о чадех своих воздыхающих, утеши и умудри; юныя от соблазнов мира и растления духовнаго сохрани; всех труждающихся щедро благослови и преуспеяние даруй; иноки подвигами душе- спасительными просвети, да светят благочестием миру всему; сущих в болезнех посети, старость не остави. Не лиши покрова священники Твоя, монахи и вся православныя в годину тяжких испытаний, и буди наша крепость и Заступница. Настави, Всеблагая Одигитрие, нас шествовати путем Христовых заповедей, и заповедь Его: «Да любите друг друга» - не словом токмо, но делом истинным нами да исполнится. И даруй потоки слез, неправды наша покаянием омывающи, тяжко бо и грозно испытани будем на Судищи Страшнем. Но Твое Матернее за ны ходатайство и тамо нас да покрывает; да восхваляется имя Твое всепетое, Пресвятая Богородице. И тако ведомые Тобою достигнем Царствия Небеснаго, идеже со всеми Богу угодившими, прославим Его, Отца и Сына и Святаго Духа, во веки веков. Аминь