Акафист к иконе "Бугобашская"

Печать
Кондак 1

Взбранной Воеводе, Богородице Одигитрии, благоволившей во спасение и утешение людей Своих веси Бугабашския, явити пречистый образ Свой на речнем камени, с предстоящими Ей святителями великими, принесем благодарственное сие и молебное пение. Ты же, Всемилостивая, яко всегда послушающая моление рабов Своих, от всяких нас бед и грехов свободи, да любовию зовем Ти: Радуйся, Благая Одигитрие, Бугабашскою иконою Своею Уфимскую землю освятившая.

Икос 1

Архангели и ангели, и праведных души на небеси дивятся Твоему милосердию к роду человеческому, грехми и скорбми обуреваемому, являеши бо дивная чудеса и силу Твою, да всякаго человека на путь спасения наставиши. Тако и малую весь Бугабашскую украсила еси нерукотворным образом Твоим, и всем припадающим к нему греховных язв и телесных недугов врачевание даруеши, да вси имея Тя таковое прибежище, зовем Ти: Радуйся, Благословенная в женах; Радуйся, Дево благодатная. Радуйся, Всевышняго Мати; Радуйся, Царице Небесе и земли. Радуйся, прибежище наше и упование; Радуйся, спасение наше и радование. Радуйся, молитвы наша приемлющая; Радуйся, всякое утешение нам подающая. Радуйся, Благая Одигитрие, Бугабашскою иконою Своею Уфимскую землю освятившая. 

Кондак 2

Видящи, Пресвятая, воинов, с войны домой грядущих и Смоленстей Твоей иконе благодарение о победе возносящих, и хотящи по времени образ сей в далекой веси прославити, положила на сердца их из реки Смоленки по камешку взяти. Тако и Тит из Бугабашской веси, взяв камень, бросити его хотяше, яко велий бе, и абие ослепнув со страхом возопи: Аллилуиа.

Икос 2  

Разум Твой кто уразумеет, Владычице, яко камень усмотрела еси, на нем же образ Свой явити восхотела; и слепотою раба Твоего Тита, хотящаго велий сей камень бросити, вразумляла. Принесши же Тит в дом свой камень сей с любовию и страхом положи его на хранение, не ведая еще, что сей камень будет. Мы же ныне ведяще промысел Твой, Преблагая, о нас грешных, взываем Ти: Радуйся, промышления Сына Твоего о роде христианстем святая служительнице; Радуйся, о всяцем человеце усердная попечительнице. Радуйся, христолюбивых воинов неусыпная охранительнице; Радуйся, путешествующих Благая Путеводительнице.  Радуйся, печальных утешение; Радуйся, всех скорбящих радосте. Радуйся, малую весь покровом Своим не оставившая; Радуйся, дивная дела в ней показавшая. Радуйся, Благая Одигитрие, Бугабашскою иконою Своею Уфимскую землю освятившая.

Кондак 3 

Пред всесильною благодатию Божией естество камня изменися, и образ Пречистой силою Божией на нем изобразися, да вси видящии сие умилятся сердцем и неправедная своя сердца покаянием изменивше, воспоют Богу: Аллилуиа.

Икос 3 

По мнозем времени восхоте Тит в день памяти святителя и чудотворца Николая освятити камень во святем источнице Николо-Березовки, достав сокровище сие, узре на нем изображение иконы Богоматери
и двух святителей, удивлением и радостию объят бысть. И мы, Пресвятая, радости о сем исполняяся, зовем Ти:  Радуйся, нерукотворным образом Твоим весь Бугабашскую украсившая;  Радуйся, сим велию любовь Твою к нам явившая.  Радуйся, дары исцелений и милостей от него источившая; Радуйся, Радосте наша, присно нас радующая. Радуйся, чистых сердцем посещение; Радуйся, смиренных сладкая Собеседнице. Радуйся, грешных спасающая; Радуйся, со всеми святыми о нас Бога умоляющая. Радуйся, Благая Одигитрие, Бугабашскою иконою Своею Уфимскую землю освятившая.

Кондак 4

Бурею недоумения объят бысть хранитель образа, егда явилася ему Богородица с прошением Своим. Восхотела бо еси, Владычице, на земли Бугабашской монашескую обитель основати, да трудами и молитвами непрестанными прославляется Божественное имя Сына Твоего поющими: Аллилуиа.

Икос 4

Слыша Тит Твое повеление ко архиерею идти и об основании обители просити, убояся, яко неграмотен и беден бяше; и вещала еси ему, Владычице, во утверждение веры и утешение: «Помогу, прокормлю». О, Всемилостивая Мати наша, прежде прошений наших вся наша нужды и скорби ведающая, и вся на пользу нам устрояющая, приими от нас благодарственное пение сие: Радуйся, волю Твою нам ясно открывающая; Радуйся, исполнити ея Сама нам помогающая. Радуйся, в земном странствии нас не оставляющая; Радуйся, быструю помощь Твою всегда нам подающая. Радуйся, Неувядаемый Цвете чистоты; Радуйся, небесное девство на земли насадившая. Радуйся, тихую обитель иноческую устроившая; Радуйся, милость Свою всем живущим в ней обещавшая. Радуйся, Благая Одигитрие, Бугабашскою иконою Своею Уфимскую землю освятившая.
Кондак 5

Устроишася обитель славная по глаголу Твоему, Пречистая, и образ Твой в знак милости и благословения, и Твоего всегда с нами пребывания водворися в ней. И множество ищущих покаяния и души своея спасения, и сирот обездоленных притекаху под кров Твой и покой себе обретаху, воспевая благодарственную песнь: Аллилуиа.

Икос 5

Ведаем Тя, Богородице, наставницу покаяния, ибо иноческий путь есть непрестанный плач о гресех и о всем мире моление; видим Тя сирот Матерь, яко во обители Твоей сим приют уготовала еси; видим Тя всем прибегающим к Тебе во всякой скорби помощницу теплую. Наученнии же сими жизнь свою в покаянии и исправлении проводити и ко всем милостивыми быти, яко чада Твоя зовем Ти: Радуйся, всякой добродетели нас научающая;  Радуйся, во смирении нас утверждающая. Радуйся, гордых сердец исцеление; Радуйся, всякия злобы и вражды искоренение. Радуйся, в скорбех наших нам сострадающая; Радуйся, сострадание и милосердие к ближним в нас вкореняющая. Радуйся, в терпении и молитве нас укрепляющая; Радуйся, мир и радость в сердцах наших возжигающая. Радуйся, Благая Одигитрие, Бугабашскою иконою Своею Уфимскую землю освятившая.

Кондак 6

 Избрала еси, Владычице, место явления Своего весь Бугабашскую и множество чудес в ней содеяла еси, и не желаше, дабы образ Твой в ином месте пребывал и знамениями различными вразумляла о сем: так во град Уфу принесенный, сей многажды со аналоя на землю спадаше, людей, похищавших его, страхом велиим устрашала еси, и возвращаху образ на место явления его, поюще Богу: Аллилуиа.
Икос 6

Проповедует, Богородице, людей множество, Твоими милостями и исцелениями чудесными одаренныя, силу и благодать великия от образа Смоленскаго нам изливаемыя. И мы во всякой нужде, не сумняся с любовию к Тебе притекаем и с верою взываем: Радуйся, Матернию любовию Твоею всегда нас покрывающая;  Радуйся, слезы скорбящих отирающая. Радуйся, слепых очей прозрение; Радуйся, злых духов изгнание. Радуйся, бед и напастей избавление; Радуйся, надеждо наша и упование. Радуйся, обители Твоей неусыпная попечительнице; Радуйся, всех даров щедрая подательнице. Радуйся, Благая Одигитрие, Бугабашскою иконою Своею Уфимскую землю освятившая.

Кондак 7

Восхотела еси, Богородице, сугубую милость Твою нам даровати и явила на иконе Твоей предстоящих Тебе двух святителей - Николая и Василия. Николая Чудотворца - весь мир чудесами своими исполнившаго, и Василия Великаго - богословием и трудами церковь Христову украсившаго, добрых пастырей, о душах наших неусыпных попечителей. Да имея таковых себе помощников и предстателей пред Господем, благодарно поем Ему: Аллилуиа.

Икос 7 

Дивную благодать источаеши, Богородице, от новоявленного Смоленскаго образа Своего, и являеши, яко возвращая телесное зрение, наипаче печешися о прозрении духовно слепотствующих и душевно недугующих, и Своим Матерним попечением призываеши их ко исправлению, да Тобою спасеннии воспевают Ти: Радуйся, Взыскание всех погибших;  Радуйся, спящия совести пробуждение.  Радуйся, к
воздержанию и трезвению призывающая;  Радуйся, пиянства грозное обличение.  Радуйся, в келиях монашествующих на молитву вразумляющая;  Радуйся, к добродетельной жизни иноков побуждающая.  Радуйся, от всякаго зла нас сохраняющая;  Радуйся, Небесными благами души наша услаждающая.  Радуйся, Благая Одигитрие, Бугабашскою иконою Своею Уфимскую землю освятившая.

Кондак 8 

Странно и страшно есть нам сие видети, яко люди беззаконнии диаволом наученнии, воссташа на веру Христову и над святынями надругашеся, и разориша храмы и обители, и люд православный гнаша и избиваша. И Ты, Пречистая, не сокрыла образа Своего от поругания и пострадала еси со стра- дающими, сих укрепляя и ободряя, неверныя же наказуя и вразумляя, о сем поем Богу: Аллилуиа. 

Икос 8

Во дни гонения не оставила еси, Владычице, избраннаго места Твоего, и аще и разорена бысть обитель, но образ Твой у людей Твоих в домах сокрывала еси, и поруганная икона Твоя исцеления как и прежде страждущим источала еси, и множество людей притекаху к ней и в сии страшныя дни с верою взывая Ти: Радуйся, Христа Бога нашего умоление; Радуйся, многих согрешений прощение. Радуйся, в годину напастей и испытаний икону Свою нам сохранившая; Радуйся, верных рабов сим образом утешающая. Радуйся, дивная Заступнице рода православнаго; Радуйся, святотатцев грозная наказательнице. Радуйся, в земней жизни наша верная наставнице; Радуйся, радости нам и славы вечныя Ходатаице.  Радуйся, Благая Одигитрие, Бугабашскою иконою Своею Уфимскую землю освятившая.

Кондак 9

Все ангельское воинство дивится безмерному Твоему милосердию к падшему роду человеческому, яко от святыя иконы,
безбожными людьми очес лишенной, всем слепотою недугующим исцеление даруеши; неверных же и от веры истинныя отшедших слепотою наказуеши, да просветятся душею и воспоют Богу: Аллилуиа. 

Икос 9

Витий словесных множество не возмогут достойно восхвалити Тя, Дево Богородице, от ангел непрестанно воспеваемую, но мы, Пречистая, любовию Твоею покрываемии и от Тебе верно наставляемии дерзаем приносити Тебе пения сицевая: Радуйся, Мати Солнца правды, Христа Бога нашего; Радуйся, светом Божественным души наша озаряющая. Радуйся, светлосте и отрадо наша сердечная; Радуйся, радосте наша безконечная. Радуйся, Живоносный Источниче, жизнь всем подающая; Радуйся, покрове, ширший облака, весь мир покрывающая. Радуйся, Скоропослушнице, молитвы наша скоро приемлющая; Радуйся, кадило благоуханное, к Сыну Твоему их возносящая. Радуйся, Благая Одигитрие, Бугабашскою иконою Своею Уфимскую землю освятившая.

Кондак 10

Спасай, Преблагословенная, всех во гресех погибающих, Воеводо непобедимая, победи неверие и раздоры в нас живущия, Путево- дительницею нами именуемая, направи пути наша по закону Христову, да Тобою верно наставляемии, поем Богу: Аллилуиа.

Икос 10

Стеною крепкою и попечительницею неотступною была еси, Владычице, людем Буга- башским и всем из окрестных весей к Смолен- стей иконе Твоей притекающим. Но восхотела еси на вразумление всех
место сие оставити, да возставят порушенную обитель Твою, и вновь с честию образ Твой в ней пребывает, и прославляется имя Твое пении сими:  Радуйся, во всяких нуждах нас не оставляющая; Радуйся, от засухи и бездождия села наша сохраняющая. Радуйся, от пожара чудно покрывающая; Радуйся, моры и глад от весей отгоняющая. Радуйся, начальствующих в справедливости и милосердии наставляющая; Радуйся, о славе Божией пещися побуждающая. Радуйся, обидимых теплое попечение; Радуйся, враждующих скорое примирение. Радуйся, Благая Одигитрие, Бугабашскою иконою Своею Уфимскую землю освятившая.

Кондак 11

Пение наше приими, Богородице, наше моление и обещания исправления, и якоже прежде, тако и ныне буди нам крепкою помощницею, и по коегождо потребе просимое даруй, да благодаряще Тя, в радости поем Богу: Аллилуиа. 

Икос 11

Свет блистающий видеша люди в разоренной Твоей обители и пасхальное служение; и слыша радостное возглашение: «Христос Воскресе», - дивишася, яко место пусто, а служение совершается, мы же радости о сем исполняяся, поем Ти: Радуйся, Небесную радость зрети на земли нас сподобляющая; Радуйся, от земных богатств души наша отвращающая. Радуйся, о чистоте Православия усердная попечительнице; Радуйся, суеверия обличение и искоренение. Радуйся, скорбящих душ утешение; Радуйся, больных посещение. Радуйся, старости поддержание; Радуйся, младенцев и юных воспитание. Радуйся, Благая Одигитрие, Бугабашскою иконою Своею Уфимскую землю освятившая.
Кондак 12

Благодатию Твоею, Владычице, разбитая гонителями веры икона Твоя обновляется, на сие с любовию взирающе, веруем и уповаем, яко и наша разбитыя грехами души и сердца обновиши, мира и радости их исполниши, да поем Богу чистым сердцем ангельскую песнь: Аллилуиа.

 Икос 12

Поем Тебе, Премилостивая, песнь хвалебную, и со умилением припадая к пречистому Твоему образу с любовию молим Тя: достойны быти нас сотвори Твоего заступления, да Тобою всегда утешеннии, поем Ти: Радуйся, Царице, всех ангел и человек Владычице; Радуйся, Царя царей на руку Твоею держащая. Радуйся, благость Его о нас умоляющая; Радуйся, свято служити Ему нас научающая. Радуйся, матерей Славо и чад их охранение; Радуйся, дев величание и Христу их обручение. Радуйся, всех притекающих к Тебе спасение; Радуйся, всех любящих Тя на Небо возведение. Радуйся, Благая Одигитрие, Бугабашскою иконою Своею Уфимскую землю освятившая.

Кондак 13.  

О Всепетая Мати, Всеблагая Одигитрие, услыши моление наше, с любовию Тебе возносимое, и принеси его Сыну Твоему, умоляя Его благость за ны грешныя, да Твоего ради Материнскаго ходатайства избавит нас вечнаго мучения, сподобит же Царствия Небеснаго наследниками быти всех, вопиющих Ему: Аллилуиа.

(Этот кондак читается трижды, затем икос 1 и кондак 1)

Кондак 1 

Взбранной Воеводе, Богородице Одигитрии, благоволившей во спасение и утешение людей
Своих веси Бугабашския, явити пречистый образ Свой на речнем камени, с предстоящими Ей святителями великими, принесем благодарственное сие и молебное пение. Ты же, Всемилостивая, яко всегда послушающая моление рабов Своих, от всяких нас бед и грехов свободи, да любовию зовем Ти: Радуйся, Благая Одигитрие, Бугабашскою иконою Своею Уфимскую землю освятившая.

Икос 1

Архангели и ангели, и праведных души на небеси дивятся Твоему милосердию к роду человеческому, грехми и скорбми обуреваемому, являеши бо дивная чудеса и силу Твою, да всякаго человека на путь спасения наставиши. Тако и малую весь Бугабашскую украсила еси нерукотворным образом Твоим, и всем припадающим к нему греховных язв и телесных недугов врачевание даруеши, да вси имея Тя таковое прибежище, зовем Ти: Радуйся, Благословенная в женах; Радуйся, Дево благодатная. Радуйся, Всевышняго Мати; Радуйся, Царице Небесе и земли. Радуйся, прибежище наше и упование; Радуйся, спасение наше и радование. Радуйся, молитвы наша приемлющая; Радуйся, всякое утешение нам подающая. Радуйся, Благая Одигитрие, Бугабашскою иконою Своею Уфимскую землю освятившая.