Акафист к иконе "Тиносская"

Печать
Кондак 1

Избранной Богом Владычице всея твари, благословенней Деве Богородице приносим смиренное поклонение, пред святым образом Ея припадающе. Ты же, Пренепорочная, приими молитвы недостойных раб Твоих и от всяких бед свободи зовущих: Радуйся, Невесто Неневестная.

Икос 1

Архангельский глас вопием Ти, Чистая: Радуйся, Благодатная, Господь с Тобою! Исполни радости духовныя и нас, Богородительнице, да благоговейною душею и чистым сердцем принесем Ти глаголы сия: Радуйся, Еюже рaдocть возсияет; радуйся, Еюже клятва изчезнет. Радуйся, падшаго Адама воззвание; радуйся, слез Евиных избавление. Радуйся, высото неудобовосходимая человеческими помыслы; радуйся, глубино неудобозримая и ангельскима очима. Радуйся, яко еси Царево седалище; радуйся, яко носиши Носящаго вся. Радуйся, Звездо, являющая Солнце; радуйся, утробо Божественнаго воплощения. Радуйся, Еюже обновляется тварь; радуйся, Еюже покланяемся Творцу. Радуйся, Невесто Неневестная.

Кондак 2

Видящи Премилосердная Мати Божия скорбное житие наше, благоизволи дати нам во утешение и отраду образ Свой святый, да всяк, взираяй на него и о воплощении Бога Слова помышляя, вопиет: Аллилуиа.

Икос 2

Разум небесный открывая, Богородице Дево, благоизволила еси многими чудесы прославити икону Твою, на острове Тиносе явленную, да вси, ведуще таковое Твое о ней благоволение, песненно Тебе зовут: Радуйся, совета неизреченнаго Таиннице;

радуйся, молчания просящих веро. Радуйся, чудес Христовых начало; радуйся, велений Его главизно. Радуйся, лествице небесная, Еюже сниде Бог; радуйся, мосте, преводяй сущих от земли на небо. Радуйся, Ангелов многословущее чудо; радуйся, бесов многоплачевное поражение. Радуйся, Свет неизреченно родившая; радуйся, еже како, ни единаго же научившая. Радуйся, премудрых превосходящая разум; радуйся, верных озаряющая смыслы. Радуйся, Невесто Неневестная.

Кондак 3

Силою свыше укреплена бывши инокиня Пелагия, егда Пресвятую Богородицу в видении узрела еси, повелевающую ей ко властем идти и об обретении честнаго образа и построении святаго храма возвестити. Она же, волю Богоматери исполняя, возопи: Аллилуиа.

Икос 3

Имущи богатство милосердия неоскудное, всем концем земли простираеши руку помощи, Небесная Царице, повелением бо Твоим открыся новый источник благодатных дарований - образ Твой честный, к немуже верни, припадающе, Тя славословят сице: Радуйся, отрасли неувядаемыя розго; радуйся, Плода безсмертнаго стяжание. Радуйся, Делателя делающая Человеколюбца; радуйся, Садителя жизни нашея рождшая. Радуйся, ниво, растящая гобзование щедрот; радуйся, трапезо, носящая обилие очищения. Радуйся, яко рай пищный процветаеши; радуйся, яко пристанище душам готовиши. Радуйся, приятное молитвы кадило; радуйся, всего мира очищение. Радуйся, Божие к смертным благоволение; радуйся, смертных к Богу дерзновение. Радуйся, Невесто Неневестная.

Кондак 4

Бурею многих бед одержимым нам помогаеши, Дево Богородице, с верою прибегающим к Тебе и покланяющимся честному образу Твоему, на Тиносе явленному. Возлюбила бо еси место сие, Владычице: источник воды целебныя бо зде открыся и святая
икона Твоя в недрех земли обретеся. Мы же, прославляя милость Твою, нам ниспосланную, Рожденному от Тебе Спасителю мира зовем: Аллилуиа.

Икос 4

Слыша святитель Гавриил об источнице воды, близ святаго алтаря во время основания церкви открывшемся, прослави Тя, Владычице Преблагая. Егда же приспе время освящения храма, нарекоша его во имя Твоего , Пречистая, «Живоприемнаго Источника», в немже Тебе радостно воспеша: Радуйся, Агнца и Пастыря Мати; радуйся, дворе словесных овец. Радуйся, невидимых врагов мучение; радуйся, райских дверей отверзение. Радуйся, яко небесная срадуются земным; радуйся, яко земная сликовствуют небесным. Радуйся, апостолов немолчная уста; радуйся, страстотерпцев непобедимая дерзосте. Радуйся, твердое веры утверждение; радуйся, светлое благодати познание. Радуйся, Еюже обнажися ад; радуйся, Еюже облекохомся славою. Радуйся, Невесто Неневестная.

Кондак 5

Боготечная звезда явися нам, Владычице, честная икона Твоего Благовещения, от Тиноса возсиявшая и весь мир лучами чудотворений озаряющая. К нейже и мы, с верою припадающе, непрестанно вопием Богу: Аллилуиа.

Икос 5

Видеша людие острова Тиноса всесвятую икону Твою, Богородительнице, в недрах земных близ святаго кладезя обретенную, радовахуся, яко открыся новый источник благодатных дарований и Тебе, возлюбившей место сие, воспеша тако: Радуйся, Звезды незаходимыя Мати; радуйся, заре таинственнаго дне. Радуйся, прелести пещь угасившая; радуйся, Троицы таинники просвещающая. Радуйся, мучителя безчеловечнаго изметающая от начальства; радуйся, Господа Человеколюбца показавшая Христа. Радуйся, варварскаго избавляющая служения; радуйся, тимения изымающая дел. Радуйся, огня поклонение угасившая; радуйся, пламене страстей изменяющая. Радуйся, верных наставнице целомудрия; радуйся, всех родов веселие. Радуйся, Невесто Неневестная.

Кондак 6

Проповедует страна Греческая преславная чудеса Твоя, Пренепорочная Дево, от святыя иконы Твоея на острове Тиносе бываемая: спасаеши бо корабли, морскими волнами потопляемыя, болящим здравие, слепым прозрение, скорбящим утешение подаеши, и всем во всяком месте и на всякий час благодатную помощь являеши, вопиющим о Тебе Всемогущему Богу: Аллилуиа.

Икос 6

Возсия благодать светозарная от пречуднаго образа Твоего, Богородице, егда дивно корабль от потопления спасла еси, призыванием Всесвятейшаго имени Твоего: морю бо, бушующуся и волнам, о брег разбивающимся, запретила еси, и люди, сущия в корабли, от гибели избавила еси. Мы же, о сем воспоминающе, глаголем Ти: Радуйся, исправление человеков; радуйся, низпадение бесов. Радуйся, прелести державу поправшая; радуйся, идольскую лесть обличившая. Радуйся, море, потопившее фараона мысленнаго; радуйся, каменю, напоивший жаждущия жизни. Радуйся, огненный столпе, наставляяй сущия во тьме; радуйся, покрове миру, ширший облака. Радуйся, пище, манны приемнице; радуйся, сладости святыя служительнице. Радуйся, земле обетования; радуйся, из неяже течет мед и млеко. Радуйся, Невесто Неневестная.

Кондак 7

Хотящи явити токи чудес от Тиносския иконы Твоея, Владычице, повелела еси в болезнех и скорбех обретающимся молебная пения пред тою совершати и, получившим благодатную помощь - проповедати всем о благодеяниях Твоих, ради тоя иконы совершаемых. Темже и мы, Тобою облагодатствованнии, вопием прославльшему Тя Богу: Аллилуиа.

Икос 7

Новая и безчисленная чудеса показа Богоматерь от пречуднаго образа Своего: отроку бо,
по молитве родителей, зрение даровала еси, афинянина Георгия от слепоты исцелила еси, отроковице Анастасии здрав ум возвратила еси, Димитрия, разслабленнаго, от недуга воздвигла еси и иныя многия от немощей душевных и телесных избавила еси, вопиющия Ти: Радуйся, цвете нетления; радуйся, венче воздержания. Радуйся, воскресения образ облистающая; радуйся, ангельское житие являющая. Радуйся, древо светлоплодовитое, от негоже питаются вернии; радуйся, древо благосеннолиственное, имже покрываются мнози. Радуйся, во чреве носящая Избавителя плененным; радуйся, рождшая Наставника заблуждшим. Радуйся, Судии праведнаго умоление; радуйся, многих согрешений прощение. Радуйся, одеждо нагих дерзновения; радуйся, любы, всякое желание побеждающая. Радуйся, Невесто Неневестная.

Кондак 8

Странники и пришельцы есмы на земли сей: житие бо наше суетно и маловременно есть. К кому убо прибегнем мы, грешнии, аще не к Тебе, Всеблагая Мати: буди убо нам Путеводительницею и Наставницею в жизни сей, многоскорбней, и сподоби выну взывати Богу, вся во благо устрояющему: Аллилуиа.

Икос 8

Все величие чудес твоих, Пречистая, несть исчислити возможно, Ты бо непрестанно подаеши милости чрез многочисленныя иконы Твоя, среди коих Тиносский Твой образ Благовещения немерцаемо сияет и нас подвизает со усердием воспевати Тебе: Радуйся, Бога невместимаго вместилище; радуйся, честнаго таинства двери. Радуйся, неверных сумнительное слышание; радуйся, верных известная похвало. Радуйся, колеснице пресвятая Сущаго на Херувимех; радуйся, селение преславное Сущаго на Серафимех. Радуйся, противная в тожде собравшая; радуйся, девство и рождество сочетавшая. Радуйся, Еюже разрешися преступление; радуйся, Еюже отверзеся рай. Радуйся, ключу Царствия Христова; радуйся, надеждо благ вечных. Радуйся, Невесто Неневестная.

Кондак 9

Все упование возлагаем на Твою благость, Пресвятая Владычице! Благодеяниям Твоим несть числа: предстоиши бо у престола Всевышняго Бога и молишися о всех нас, любовию чтущих Тя, и покланяющихся цельбоносному образу Твоему, и вопиющих о Тебе немолчно: Аллилуиа.

Икос 9

Ветийство наше песненное не довлеет к прославлению многих чудес Твоих, Богородительнице, ихже от иконы Твоея явила еси и присно являеши верным: обаче Ты, яко воистину Благая Мати, веру и усердие наше примии и милостивно услыши сия похвалы: Радуйся, премудрости Божия приятелище; радуйся, промышления Его сокровище. Радуйся, любомудрыя немудрыя являющая; радуйся, хитрословесныя безсловесныя обличающая. Радуйся, яко обуяша лютии взыскателе; радуйся, яко увядоша баснотворцы. Радуйся, афинейская плетения растерзающая; радуйся, рыбарския мрежи исполняющая. Радуйся, из глубины неведения извлачающая; радуйся, многи в разуме просвещающая. Радуйся, кораблю хотящих спастися; радуйся, пристанище житейских плаваний. Радуйся, Невесто Неневестная.

Кондак 10

Спасти хотящи многия от находящих зол и болезней, чудную икону Твою и Живоносный Источник на острове Тиносе явила еси, да вси вернии в скорбех и напастех к Тебе, Царице Небесней, с верою несумненною прибегают, взывая хвалебно: Аллилуиа.

Икос 10

Стена еси Ты, ограждающая от всяких бед и болезней, Пресвятая Богородице, со умиленною молитвою призывающим в помощь Твое матернее милосердие. Темже и мы, припадающе пред образом

Твоим, молим Тя: благопоспешно спаси и помилуй нас, с верою и любовию вопиющих Ти из глубины души: Радуйся, столпе девства; радуйся, дверь спасения. Радуйся, начальнице мысленнаго наздания; радуйся, подательнице Божественныя благости. Радуйся, Ты бо обновила еси зачатыя студно; радуйся, Ты бо наказала еси окраденныя умом. Радуйся, тлителя смыслов упраждняющая; радуйся, Сеятеля чистоты рождшая. Радуйся, чертоже безсеменнаго уневещения; радуйся, верных Господеви сочетавшая. Радуйся, добрая младопитательнице девам; радуйся, невестокрасительнице душ святых. Радуйся, Невесто Неневестная.

Кондак 11

Пение наше не презри, Пресвятая Дево, и любве Твоея не лиши нас, щедрую руку помощи Твоея нам простирающи, да прославляя милости и чудеса Твоя, поем Триединому Богу: Аллилуиа.

Икос 11

Светлыми лучами чудес образ Твой, Дево Пречистая, на Тиносе сияет и весь мир благодатно озаряет знамении и чудесы. Благоизволила еси, Владычице, и стольному граду нашему Киеву даровати подобие честныя иконы сия, во обители Благовещения сию прославивши, да и мы, взирая на Твой чудный лик, благодарно взываем: Радуйся, луче умнаго Солнца; радуйся, светило незаходимаго Света. Радуйся, молние, души просвещающая; радуйся, яко гром враги устрашающая. Радуйся, яко многосветлое возсияваеши просвещение; радуйся, яко многотекущую источаеши реку. Радуйся, купели живописующая образ; радуйся, греховную отъемлющая скверну. Радуйся, бане, омывающая совесть; радуйся, чаше, черплющая рaдocть. Радуйся, обоняние Христова благоухания; радуйся, животе тайнаго веселия. Радуйся, Невесто Неневестная.

Кондак 12

Благодать Божественную испроси нам у Сына Твоего и Бога, простри нам руку помощи, Владычице, умири жизнь нашу, да не погибнем люте, но от всякаго зла сохрани нас, под осенение Твоея святыя иконы прибегающих и со умилением поющих: Аллилуиа.

Икос 12

Поюще Твоя чудеса, бывшая в древняя и настоящая времена, хвалим Тя, яко Живоносный Источник благодати, яко бездну милостей и щедрот, и все упование на Тя возложив, пред чудотворным образом Твоим поем: Радуйся, селение Бога и Слова; радуйся, святая святых большая. Радуйся, ковчеже, позлащенный Духом; радуйся, сокровище живота неистощимое. Радуйся, честный венче царей благочестивых; радуйся, честная похвало иереев благоговейных. Радуйся, Церкве непоколебимый столпе; радуйся, Царствия нерушимая стено. Радуйся, Еюже воздвижутся победы; радуйся, Еюже низпадают врази. Радуйся, тела моего врачевание; радуйся, души моея спасение. Радуйся, Невесто Неневестная.

Кондак 13

О, Всепетая Мати, рождшая всех святых Святейшее Слово! Нынешнее наше приемши пение, от всякия бед, скорбей и напастей, и от враг видимых и невидимых нас свободи, и будущаго избави осуждения вопиющих: Аллилуиа, Аллилуиа, Аллилуиа.

(Этот кондак читается трижды, затем икос 1 и кондак 1)

Кондак 1

Избранной Богом Владычице всея твари, благословенней Деве Богородице приносим смиренное поклонение, пред святым образом Ея припадающе. Ты же, Пренепорочная, приими молитвы недостойных раб Твоих и от всяких бед свободи
зовущих: Радуйся, Невесто Неневестная.

Икос 1

Архангельский глас вопием Ти, Чистая: Радуйся, Благодатная, Господь с Тобою! Исполни радости духовныя и нас, Богородительнице, да благоговейною душею и чистым сердцем принесем Ти глаголы сия: Радуйся, Еюже рaдocть возсияет; радуйся, Еюже клятва изчезнет. Радуйся, падшаго Адама воззвание; радуйся, слез Евиных избавление. Радуйся, высото неудобовосходимая человеческими помыслы; радуйся, глубино неудобозримая и ангельскима очима. Радуйся, яко еси Царево седалище; радуйся, яко носиши Носящаго вся. Радуйся, Звездо, являющая Солнце; радуйся, утробо Божественнаго воплощения. Радуйся, Еюже обновляется тварь; радуйся, Еюже покланяемся Творцу. Радуйся, Невесто Неневестная.